کابل؛ د مرکزي زون د ۱۵۰ ورزشکارانو ترمنځ د کيک جيتسو ټاکنيزې سیالۍ پيل شوې
د المپيک، بدني روزنې او ورزش عمومي رياست اړوند د رزمي ورزشونو ملي فدراسيون له لوري د مرکزي زون څلورو ولايتونو ( کابل، پروان، کاپيسا او ميدان وردګ ) څخه د ۱۵۰ ورزشکارانو ترمنځ د دې رياست په ۲ زره ۵۰۰ کسيز جمنازيوم کې د کيک جيتسو ټاکنيزې سيالۍ پيل شوې.
په دغه سياليو کې به ۱۵۰ ورزشکاران د کوچنيانو، نوي ځوانانو، ځوانانو او لويانو په عمري کټګورۍ او ۴۸ بېلابېلو وزني کټګوريو کې د يو بل پر وړاندې سيالۍ ترسره کړي، چې په پای کې به يې ۲۴ ورزشکاران د مرکزي زون کيک جيتسو منتخبې لوبډلې ته وټاکل شي.
د دې سیالیو د پيل په مراسمو کې د هېواد ورزش ادارې ورزشي سلاکار، قاري حيات الله رحماني، ورزشي مسوولينو، ورزشکارانو او د ورزش ګڼ شمير مينوالو ګډون کړی وو.
د يادونې وړ ده، چې دغه سیالۍ د مرکزي زون کيک جيتسو منتخبې لوبډلې ته د غوره لوبغاړو موندلو په موخه پيل شوي، چې دوې ورځې به دوام وکړي.
