کابل؛ د وزلوبې شپږم پړاو غوره لیګ سياليو په دوام، د اتو غوره لوبډلو په سیالیو کې بغلان، یما پټرول او سمنګان لوبډلو برياوې خپلې کړې
د وزلوبې او نېزه وهنې شپږم پړاو غوره ليگ سياليو په لړ کې د یادو سیالیو دویم پړاو د اتو غوره لوبډلو ترمنځ پیل شوې چې پکې بغلان، یما پټرول او سمنګان لوبډلو بریاوې خپلې کړې.
د یادو سیالیو د دویم پړاو سیالیو په لومړۍ لوبه کې بغلان لوبډلې د ٢ پر یو نمرې په توپیر کندز لوبډلې ته، په دویمه لوبه کې یما پټرول لوبډلې د ١١ پر ٤ نمرو په توپیر فاریاب ځوانانو او درېیمه لوبه کې سمنګان لوبډلې د ٢ پر یو نمرې په توپیر د بلخ ځوانانو لوبډلې ته ماتې ورکړه.
ټاکل شوې چې د يادو سياليو پر دوام به سبا لومړۍ لوبه د بدخشان او سرپل، دویمه لوبه د کندز او فاریاب ځوانانو او درېیمه لوبه د یما پټرول او بغلان لوبډلې ترمنځ ترسره شي.
د وزلوبې او نيزه وهنې شپږم پړاو غوره ليگ سيالۍ د المپيک، بدني روزنې او ورزش رياست په همکارۍ او د وزلوبې، نیزه وهنې او سيمه ييزو لوبو ملي فدراسيون له لوري د ۱۱ لوبډلو ترمنځ د کابل ښار په يک توت لوبغالي کې پيل شوي دي، چې د ليندۍ مياشتې تر ۲۵مې نيټې پورې به دوام وکړي.
