له ١٧ کلنو کم عمره افغان فوټبال ملي لوبډلې بنګلدیش ته د ۳-۲ ګولونو په توپیر ماتې ورکړه
د ٢٠٢٥ کال د آسیا ملتونو جام سیالیو د مقدماتي لوبو په لړ کې له ١٧ کلنو کم عمره افغان لوبډلې په خپله وروستۍ لوبه کې بنګله دېش ته د ۳-۲ ګولونو په توپیر ماتې ورکړه او خپل بریالی سفر یې پای ته ورساوه.
له ١٧ کلنو کم عمره افغان فوټبال لوبډله څو ورځې وړاندې د ٢٠٢٥ کال د آسیا ملتونو جام سیالیو کې د ګډون په موخه کمبودیا هېواد ته لاړه او په B ګروپ کې یې له ماکائو، فلیپین کمبودیا او بنګله دېش هېوادونو سره لوبې ترسره کړې او ټولې یې وګټلې.
دا سیالۍ د روانې اکتوبر میاشتې په ١٩مه نېټه په کمبودیا کې پیل شوې او د همدې میاشتې تر ٢٧مې نېټې پورې یې دوام وکړ.
هېره دې نه وي چې تر دې وړاندې افغان لوبډلې فلپین لوبډلې ته د ۸پر صفر، ماکائو ته د ۹ صفر، کمبودیا ته د ۳ـ۱ او نن یې بنګلدیش ته د ۳-۲ ګولونو په توپير ماتې ورکړه او په خپل ګروپ کې يې د ۱۲ امتيازونو په ترلاسه کولو سره لومړی مقام خپل کړ.
د یادونې وړ ده چې افغان لوبډلې د دغه بریالي سفر په ترڅ کې د ۲۰۲۵ کال اسیا جام ته لاره ومونده.
