یوازې دوې ورځې وروسته؛ افغانستان دا ځل د ورزش په ډګر کې د نړۍوالو کوربه دی.
د المپیک، بدني روزنې او ورزش ریاست ویاړ لري، چې د اوو هېوادونو ترمنځ د کورش، سامبو او دودیزې غېږ نیونې بین المللي جشنوارې کوربه توب پر غاړه لري.
ټاکل شوې، چې په دغې جشنواره کې، چې په پلازمېنه کابل کې ترسره کېږي؛ له افغانستان، ازبیکستان، قرغیزستان، تاجیکستان، ترکمنستان، ایران او ترکیې څخه د کورش له ١۶۰ زیات ملي لوبغاړي ګډون وکړي.
دا جشنواره یوازې سیالۍ نه؛ بلکې د افغانستان د کلتوري هویت د نړۍوال کېدو، د دودیزو ورزشونو د ودې، نړۍ ته د افغان ورزشکارانو د وړتیا ښودلو او د نړیوالو اړیکو د پیاوړتیا یو مهم فُرصت بلل کېږي.
د المپیک، بدني روزنې او ورزش ریاست د دغو سیالیو د ترسراوي لپاره بشپړ چمتو والی لري او له ګرانو هېوادوالو او د ورزش له مینوالو غواړي، چې د سیالیو لیدو ته راشي او خپل ملي اتلان له نږدې تشویق کړي.
د یادونې وړ ده، چې دغه ورزشي جشنواره له ملي سپورټ ټلویزیون څخه په ژوندۍ بڼه خپریږي.
