د کابل ښار ۹۰ ورزشکارانو ترمنځ د پاورلیفټینګ شپږم پړاو سیالۍ پای ته ورسېدې
د المپيک کمېټې، بدني روزنې او ورزش عمومي ریاست اړوند د پارولیفټینګ ملي فدراسیون له لوري د یاد ریاست په زور خانه یي ورزشي جمنازیوم کې د کابل ښار ۹۰ ورزشکارانو ترمنځ په تکبنج پرس سبک کې د پاورلیفټینګ شپږم پړاو سیالۍ د غوره لوبغاړو په ټاکلو پای ته ورسېدې.
دغه سیالۍ د کابل ښار له بېلا بېلو کلبونو ورزشکارانو ترمنځ د نویو ځوانانو، ځوانانو، لویو ورزشکارانو او د تجربه لرونکو ورزشکارانو ترمنځ ترسره شوې، چې په پایله کې ۲۷ تنو ورزشکارانو خپلو سیالانو ته په ماتې ورکولو سره لومړي مقامونه ترلاسه کړل او اتلولي یې خپله کړه.
د دغو سیالیو د پای مراسمو ته د المپیک کمېټې، بدني روزنې او ورزش عمومي ریاست مالي او اداري ریئس مولوي عبدالناصر هاشمي، د یاد ریاست د دعوت او ارشاد ریئس مولوي داد محمد بریال عطایي، د پارولیفټینګ ملي فدراسیون رهبري، ورزشکاران او زیات شمېر مینوال راغلي وو.
د یادو سیالیو موخه په تکبنج پرس سبک کې د غوره لوبغاړو موندل او د ورزشکارانو د ظرفیت لوړول و، چې دوې ورځې یې دوام وکړ.
