کابل کې ۱۵ روزونکو ته د ساحلي فوټبال لومړۍ درجه روزنیز کورس پای ته ورسېده
د اسیا د روزونکو فدراسیون له لوري او د ایران هېواد مدرس کورش شجاع تر نظارت لاندې په فوټبال ملي فدراسیون کې د هېواد له مرکز او ولایتونو ۱۵ روزونکو ته د ساحلي فوټبال لومړۍ درجه روزنیز کورس پای ته ورسېده، چې شپږ ورځې یې دوام وکړ.
د دغه ښوونیز کورس د پای مراسمو ته د المپيک کمېټې، بدني روزنې او ورزش عمومي رییس مولوي احمد الله وثیق، د یاد ریاست او د فوټبال ملي فدراسیون فني او مسلکي مرستیال حافظ احمد جان ځدراڼ، د ورزش ادارې ورزشي مشاور قاري حیات الله رحماني، د هېواد د فوټبال ملي فدراسیون او د ساحلي فوټبال کمېټې رهبري پلاوي، د کورش مدرس او روزونکي راغلي وو.
په دغه روزنیز کورس کې د ایران هېواد مدرس کورش شجاع افغان روزونکو ته د ساحلي فوټبال پېژندنې او بلدتیا، په تخنیکي او تکتیکي موضوعاتو، د ارواپوهنې او د بدن جوړونې په مضوعاتو خبرې وکړې.
د فوټبال ملي فدراسیون ساحلي فوټبال کمېټې مسوولینو دغه روزنیز کورس د روزونکو د ظرفیت لوړولو په برخه کې ډېر ګټور یاد کړ او دوی غوښتل، چې دا ډول روزنیز کورسونه نور هم برابر کړي.
د کورس په پای کې روزونکو ته لومړی درجه د روزنې سندونه ورکړل شول.
