کابل؛ د افغانستان ملي پوهنتون کې د فوټسال ورزشي لوبغالی پرانیستل شول
د هېواد المپیک ملي کمېټې او د بدني روزنې او ورزش لوی ریاست په همغږۍ او د خصوصي سکتور په مرسته یاد پوهنتون کې د محصلینو د سالمې روزنې په موخه د ۷۵۰ زره افغانیو په لګښت د فوټسال ورزشي لوبغالی پرانیستل شو.
دغه پرانیستغونډه کې د المپیک ملي کمېټې او د بدني روزنې او ورزش لوی ریاست فني او مسلکي معاون حافظ احمد جان ځدراڼ، د فوټبال ملي فدراسیون رییس محمد یوسف کارګر، د افغانستان ملي پوهنتون رییس صداقت یعقوبي د یاد پوهنتون استاذانو، محصلینو او ورزشکارانو ګډون کړی وو.
په دغه پرانیستغونډه کې د المپیک ملي کمېټې او د بدني روزنې او ورزش لوی ریاست فني او مسلکي معاون حافظ احمد جان ځدراڼ وویل: د بدني روزنې او ورزش لوی ریاست ۵۴ فعال فدراسیونونه لري، چې دغه فدراسیونونو د تېرو ۲۰ کلونو په پرتله د ااا په راتګ سره په تېرو درې کلونو کې ډېر پرمختګ کړی دی او ورزش له مرکز نه ولایتونو ته او له ولایتونو نه ولسوالیو ته رسېدلې دی.
ښاغلي ځدراڼ زیاته کړه: د بدني روزنې او ورزش لوی ریاست رهبري هر وخت چمتو ده، چې د ملي پوهنتون محصلینو سره هر ډول مرسته وکړي او د یاد ریاست کلبونه او جمنازیومونه د دوې په خدمت کې دي، تر څو چې ګټه ترې واخلي.
ورپسې د فوټبال ملي فدراسیون رییس محمد یوسف کاګر وویل: د ملي پوهنتون رهبري څخه ډېره مننه چې داسې احساس ورسره پیدا شو، چې محصلینو ته د زده کړو ترڅنګ د ورزش زمینه هم برابره کړه او همدغه ورزشکاران زموږ ویاړونه دي او موږ له ملي پوهنتون سره هر ډول که هغه فني مرسته وي که تخنیکي مرسته وي موږ چمتو یو.
وروسته د افغانستان ملي پوهنتون رییس صداقت یعقوبي راغلو ګډونوال څخه مننه وکړه او وویل: خوښ خوشحاله یم زموږ د محصلینو او ورزشکارانو هغه د امنیت ارمان، چې تېرو ۴۵ کالو کې درلوده پوره شو تر څو دوې وکولای په ارام مغز سره خپلې زده کړې ترسره کړي او ورزش د درس زده کولو لپاره ډېر ضروري دی په اخر کې د ورزش ادارې څخه مننه کوم، چې په داسې اقتصادي مشکلاتو کې د ولس ترڅنګ ولاړ دي.
د یادې پرانیستغونډې وروسته د حقوقو او سياسي علومو پوهنځي او معالجوي طب پوهنځي د فوټسال لوبډلو ترمنځ سیالي ترسره شوه، چې په پایله کې د حقوقو او سياسي علومو پوهنځي لوبډلې خپلې سیالې لوبډلې ته د ۴/۳ ګولونو په توپیر ماتې ورکړه او بریا یې خپله کړه.
هېره دې نه وي دغه لوبغالی د ملي پوهنتون محصلینو او ځایی خلکو لپاره پرانیستل شو او موخه یې د محصلینو لپاره یوه سالمه تفریح برابرول او د ځوانانو له نشه یی توکو لرې والی وو.
