کنړ؛ برسرای شهزاده گانو لوبډلې د اختریز جام په نوم د ټېپ بال کرکټ سياليو اتلولي وگټله
د کنړ ولايت د بدني روزنې او ورزش امريت د سرکاڼو ولسوالۍ په بحراباد سيمه کې د ۱۵ لوبډلو ترمنځ له لوري د اختریز جام په نوم د ټېپ بال کرکټ سيالۍ د برسرای شهزاده گانو لوبډلې په اتلولۍ پای ته ورسېدې.
د يادو سياليو پايلوبه د برسرای شهزاده گانو او بحراباد لوبډلو ترمنځ ترسره شوه، بحراباد لوبډلې د لوبې پچې په گټلو سره په ټاکلو لسو اورونو کې د اوو لوبغاړو په سوځېدو سره سیالې لوبډلې ته د ۱۰۵ منډو هدف کېښود، برسرای لوبډلې ياد هدف په وروستي اور کې ترلاسه کړ او د اوو ويکټو په توپير يې بريا خپله کړه.
د يادونې وړ ده، چې دغو سياليو شاوخوا ۱۵ ورځې دوام وکړ او په پای کې اتلې لوبډلې ته يو سېرلی، دويم مقام گټونکې لوبډلې ته کپ او غوره لوبغاړو ته مډالونه او ستاينليکونه ورکړل شول.
