لغمان؛ اليشنگ ولسوالۍ کې د ۱۴ لوبډلو ترمنځ د ټېپ بال کرکټ سيالۍ پای ته ورسېدې
د لغمان ولايت د بدني روزنې او ورزش امريت اړوند د ټېپ بال کرکټ فدراسيون د استازولۍ له لوري د اليشنگ ولسوالۍ په سالاب کلي کې د ۱۴ لوبډلو ترمنځ د ټېپ بال کرکټ سيالۍ د اسلام آباد لوبډلې په اتلولۍ پای ته ورسېدې.
د يادو سياليو پايلوبه د اسلام آباد او سرورخېلو ځوانانو لوبډلو ترمنځ ترسره شوه، چې په پايله کې اسلام آباد لوبډلې په ټاکلو لسو اورونو کې د څلورو لوبغاړو په سوځېدو سره سیالې لوبډلې ته د ۱۴۴ منډو هدف کېښود، سرورخېلو ځوانانو لوبډلې ياد هدف تر لاسه نه کړ او ۲۴ منډو په توپير يې ماته ومنله.
د دغو سياليو د ترسره کېدو موخه ځوانانو ته سالمه تفريح برابرول او د ټېپ بال کرکټ لوبې ته وده ورکول ښودل شوي وو، چې ۱۵ ورځې يې دوام وکړ او په پای کې د ياد ولايت د ورزش امريت له لوري لومړي او دويم مقام گټونکو لوبډلو ته کپونه او غوره لوبغاړو ته ستاينليکونه او مډالونه ورکړل شول.
