برادران نورزاد لوبډلې د نيمروز ولايت د فوټبال غوره ليگ سياليو اتلولي وگټله
د نيمروز ولايت د بدني روزنې او ورزش امريت اړوند د فوټبال فدراسيون د استازولۍ له لوري په زرنج ښار کې د لسو لوبډلو ترمنځ د فوټبال گروپي سيالۍ، چې دوه مياشتې مخکې پيل شوې، د برادران نورزاد لوبډلې په اتلولۍ پای ته ورسېدې.
د يادو سياليو پايلوبه د برادران نورزاد او ابو مسلم لوبډلو ترمنځ ترسره شوه، چې په پايله کې سيالۍ په ټاکلي وخت مساوي پای ته ورسېده، خو په پنالټيانو کې برادران نورزاد لوبډلې سيالې لوبډلې ته ۱/۳ گولونو په توپير ماتې ورکړه او اتلولي يې خپله کړه.
د دغو سياليو د ترسره کېدو موخه د ورزش وده او د نشه يي توکو څخه لرې والی ښودل شوي وو، چې په پای کې د ياد ولايت د ورزش امريت له لوري اتلې لوبډلې ته د اتلولۍ جام او غوره لوبغاړو ته بېلابېلې چمتو شوې ډالۍ ورکړل شوې.
