ننگرهار؛ دوبېله ټايگرز لوبډلې د ټغر ټېپ بال کرکټ ليگ سياليو اتلولي وگټله
د ننگرهار ولايت د بدني روزنې او ورزش رياست اړوند د ټېپ بال کرکټ فدراسيون د استازولۍ له لوري په بهسودو ولسوالۍ کې د ۵۰ لوبډلو ترمنځ د ټغر ټېپ کرکټ غوره لیگ (TPL) سيالۍ د دوبېله ټايگرز لوبډلې په اتلولۍ پای ته ورسېدې.
د يادو سياليو پايلوبه د دوبېله ټايگرز او پشه يي ځوانانو لوبډلو ترمنځ ترسره شوه، چې په پايله کې پشه يي ځوانانو لوبډلو په ټاکلو اتو اورونو کې د څلورو لوبغاړو په سوځېدو سره خپلې سيالې لوبډلې ته د ۱۲۰ منډو هدف کېښود، دوبېله ټايگرز لوبډلې ياد هدف د درېيو لوبغاړو په سوځېدو سره په وروستي اور کې ترلاسه کړ او د اوو ويکټو په توپير يې بريا خپله کړه.
د دغو سياليو د ترسره کېدو موخه د پخوانيو دودونو ساتل وو، چې شاوخوا يوه نيمه مياشت يې دوام وکړ او په پای کې گټونکې لوبډلې ته يوه عراده بايسکل او غوره لوبغاړو ته کپونه، مډالونه او چمتو شوې ډالۍ ورکړل شوې.
