ننگرهار؛ دور بابا ولسوالۍ کې د لسو لوبډلو ترمنځ د ټېپ بال کرکټ سيالۍ پيل شوې
د ننګرهار ولايت د بدني روزنې او سپورټ رياست اړوند د شينوارو شپږگونو ولسواليو سپورټي مدیریت له لوري د دور بابا ولسوالۍ په مرکزي ورزشي لوبغالي کې د لسو لوبډلو ترمنځ د ځوانانو د يووالي په نوم د ټېپ بال کرکټ سيالۍ د شگۍ لوبډلې په بريا پيل شوې.
د يادو سياليو لومړۍ لوبه د شگۍ او سور کلي لوبډلو ترمنځ ترسره شوه، چې په پايله کې شگۍ لوبډلې په ټاکلو لسو اورونو د پنځو لوبغاړو په سوځېدو سره خپلې سيالې لوبډلې ته د ۱۵۲ منډو هدف کېښود، سور کلي لوبډلې ياد هدف تر لاسه نه کړ او د ۲۲ منډو په توپير يې ماته ومنله.
د دغو سياليو موخه د ځوانانو تر منځ يووالی او له نظام څخه ملاتړ ښودل شوی دی، چې ۱۵ ورځې به دوام وکړي.
