خوست؛ عرفان دلپوري لوبډلې د تڼيو ولسوالۍ د واليبال سياليو اتلولي وگټله
د خوست ولايت د بدني روزنې او سپورټ آمريت اړوند د واليبال فدراسيون د استازولۍ له لوري د تڼيو ولسوالۍ په طاؤس زمزم ميدان کې د ۱۴ لوبډلو ترمنځ د واليبال سيالۍ د عرفان دلپوري لوبډلې په اتلولۍ پای ته ورسېدې.
د يادو سياليو پايلوبه د عرفان دلپوري او لکڼو منتخب لوبډلو ترمنځ ترسره شوه، چې د وخت کمښت له امله يو ميدان ترسره شو، چې په پايله کې عرفان دلپوري لوبډلې خپلې سيالې لوبډلې ته د ۱۲/۱۵ نمرو په توپير ماتې ورکړه او بريا يې خپله کړه.
د دغو سياليو موخه ورزش ته د ځوانانو هڅول او د نشه يي توکو پر وړاندې مبارزه ياده شوې وه، چې يوه ورځ يې دوام وکړ.
د سياليو په پای کې لومړي او دويم مقام گټونکو لوبډلو ته نغدي ډالۍ ورکړل شوې.
