غور؛ د فيروز کوه ښار الف لوبډلې د فيروز کوه ښار د واليبال سياليو اتلولي وگټله

د غور ولایت د بدني روزنې او سپورټ آمريت اړوند د واليبال فدراسيون د استازولۍ له لوري د فيروز کوه ښار په ورزشي جمنازيوم کې د څلورو لوبډلو ترمنځ د واليبال دوستانه سيالۍ د فيروز کوه ښار الف لوبډلې په اتلولۍ پای ته ورسېدې.

په دغو سياليو کې د فيروز کوه ښار A,B,C او شينکوت بازانو لوبډلو گډون کړی وو.

د يادو سياليو پايلوبه د فيروز کوه ښار الف او شينکوت بازانو لوبډلې ترمنځ ترسره شوه، چې په پايله کې فيروز کوه ښار الف لوبډلې خپلې سيالې لوبډلې ته د ۱/۳ گولونو په توپير ماتې ورکړه او بريا يې خپله کړه.

د دغو سياليو موخه د ورزشکارانو تر منځ ښې اړيکې او د ياد ورزش وده ښودل شوی وه، چې دوې ورځې يې دوام وکړ.

د سياليو په پای کې لومړي او دويم مقام گټونکو لوبډلو ته کپونه او غوره لوبغاړو ته ستاينليکونه ورکړل شول.