کندهار؛ ارغنداب ولسوالۍ کې د ۳۲ لوبډلو ترمنځ ۱۲ اوریزه ټېپ بال کرېکټ سیالۍ پیل شوې
د کندهار ولایت د ټېپ بال کرېکټ فدراسیون د استازولۍ له لوري د یاد ولایت د بدني روزنې او ورزش ریاست سره په همغږۍ د ارغنداب ولسوالۍ په میانجۍ کلي کې د ۳۲ لوبډلو ترمنځ د ټېپ بال کرېکټ ۱۲ اوریزې یو میاشتنۍ سیالۍ د ورزشي مسوولینو او قومي مشرانو په حضور کې پیل شوې.
د سیالیو پیل لوبه د اسحاق فیروز او بارک کاروان لوبډلو ترمنځ وشوه، چې بارک کاروان لوبډلې د ټولو لوبغاړو په سوځېدو په ټاکلو اورونو کې سیالې لوبډلې ته ۸۷ منډې هدف وټاکه. اسحاق فیروز لوبډله د لوبې په څلورم اور کې د عزیز احمد د چټکو ۴۲ منډو په ترسره کولو یاد هدف پوره او د سیالیو پیل لوبه یې وګټله.
د یادونې ده، چې کلیوال ځوانان ورزش ته هڅول، سالمه تفرېڅ او د ورزش پراختیا د یادو سیالیو موخه ښودل شوې ده.
