د المپیک ملي کمېټې او سپورټ عمومي رئيس د هاکي فدراسیون له رهبري او د ملي لوبډلې له ورزشکارانو سره ولیدل
د المپیک ملي کمېټې او سپورټ عمومي رئيس الحاج مولوي عبدالودود حقاني په خپل کاري دفتر کې د هاکي فدراسیون له رئیس عبدالله مایار نورستاني او د ملي لوبډلې له لوبغاړو سره لیدنه وکړه او د روان تمریناتي کمپ پر اړه يې ورسره هر اړخیزې خبرې وکړې.
د المپیک ملي کمېټې او سپورټ عمومي رئيس په دې لیدنه کې د یاد فدراسیون د رهبري او ملي لوبډلې د ورزشکارانو شته ستونزې او غوښتنې واورېدې او د دوی د هڅو د ستاینې ترڅنګ يې د هر ډول ممکنې همکارۍ ډاډ ورکړ.
ښاغلي حقاني د یاد فدراسیون له ورزشکارانو وغوښتل چې په روان تمریناتي کمپ کې زیار وباسي، ترڅو د عمان هیواد په کوربتوب د ۲۰۲۴کال د هاکي فایف کوالیفای نړۍوالو سیالیو کې ښې لاسته راوړنې ولري.
د هاکي فدراسیون رئیس او رهبري له ښاغلي حقاني مننه وکړه، چې د یاد تمریناتي کمپ زمینه یې ورته جوړه کړې او هم یې د عمان هیواد په سیالیو کې د ګډون په موخه همکاري کړې ده.
د هیواد د هاکي د ملي لوبډلې ۲۴ ورزشکاران د روزونکو په ګډون اوس مهال په پلازمېنه کابل کې په اووه ورځني تمریناتي کمپ بوخت دي، چې موخه يې د ۲۰۲۴ کال هاکي فایف کوالیفای نړۍوالو لوبو کې د ګډون په موخه چمتووالی دی، چې د روان کال د اګسټ میاشتې له ۲۵مې د سپټمبر تر درېيمې ڼېټې پورې به د عمان هیواد په کوربتوب ترسره شي.
ټاکل شوې ده، چې د یاد تمریناتي کمپ په پای کې به د هاکي فدراسیون د فني کمېټې له لوري د یو روزونکي په ګډون د دې فدراسیون ۱۰ کسیزه ملي لوبډله وټاکل شي، چې د افغانستان په استازولۍ به د هاکي فایف کوالیفای په نړۍوالو لوبو کې ګډون وکړي.
دا په داسې حال کې ده، چې د المپیک ملي کمېټې او سپورټ عمومي رئیس الحاج مولوي عبدالودود حقاني تېره ورځ د سنوکر فدراسیون له رهبري غړو او د دې فدراسیون له هغو ورزشکارنو سره ولیدل، چې د ایران هیواد په کوربتوب يې په اسیايي سیالیو کې درې د برونزو مډالونه ګټلي وو.
