د تکواندو ملي لوبډله نړۍوالو سیاليو کې د ګډون په موخه آذربایجان ته روانه شوه
دافغانستان تکواندو ملي لوبډله د المپيک ملي کمېټې او سپورټ عمومي رئيس الحاج مولوي عبدالودود حقاني سره تر ليدنې او خداى پاماني وروسته د تکواندو نړيوالو لوبو کې د ګډون او لوبېدو په موخه د آذربايجان هېواد ته روان شوه.
د مخه ښې په دې مراسمو کې د المپيک ملي کمېټې او سپورټ عمومي رياست رئیس الحاج مولوي عبدالودود حقاني، د المپيک ملي کمېټې اجرائیه رئیس داد محمد پاينده اختري او د تکواندو فدراسیون مسوولينو شتون درلود.
د المپيک ملي کمېټې او سپورټ عمومي رئيس ښاغلي حقاني د تکواندو له ورزشکارانو سره د ليدنې پر مهال دوی ته په دې لوبو کې د الله تعالی له درباره د بریا هیله څرګنده کړه او له دوی يې وغوښتل تر څو په ټوله نړۍ کې د افغانستان نوم او نښان اوچت کړي.
نوموړي ورزشکارانو سره د هر ډول ممکنې همکارۍ ډاډ څرګند کړ او زياته يې کړه؛ افغانان هم حق لري چې د نړۍ نورو هېوادونو په څېر په بهرنيو هېوادونو کې لوبې وکړي.
د تکواندو نړيوالي لوبې د آذربایجان په پلازمېنه باکو کې د روانې مې مياشتې په ٢٨ نېټه د افغانستان په ګډون د ۲۰۰سوو هېوادونو د تکواندو ورزشکارانو په ګډون پيل شوې، چې د جون تر څلورمې نېټې به دوام وکړي.
په دغو سياليو له افغانستان څخه په اتو وزنونو کې اتو ورزشکارانو، يوه روزونکي، يوه ترينر او د تکواندو ملي فدراسیون رئيس ګډون کوی.
د تکواندو ملي فدراسیون د معلوماتو له مخې په دغو سياليو د تکواندو درې تنه ورزشکاران په ايران کې تر تمريناتو وروسته وړمه ورځ آذربایجان هېواد ته رسېدلي دي.
