د ننګرهار او لغمان د معلولو ورزشکارانو ترمنځ د باسکټبال دوستانه سیالي ترسره شوه
د ننګرهار ولایت د بدني روزنې او ورزش ریاست په همکارۍ د ننګرهار او لغمان ولایتونو د معلولو ورزشکارنو ترمنځ د باسکېټبال یو ورځنۍ دوستانه سیالي ترسره شوه.
دغه سیالي په ټایلنډ هیواد کې د اسیا په کچه د افغانستان د معلولو ورزشکارانو د دویم مقام ګټلو په ویاړ ترسره شوه، چې په پایله کې د ننګرهار معلولو ورزشکارانو خپلې سیالې لوبډلې ته د ۳۹-۱۵ ګولونو په توپیر ماتې ورکړه او سیالي یې وګټله.
د یادونې وړ ده، چې د یاد ولایت د بدني روزنې او ورزش ریاست له لوري هغو درېوو تنو معلولو ورزشکارانو ته مډالونه او ستاینلیکونه ورکړل شول، چې د ټایلنډ هیواد په کوربتوب یې په اسیایي سیالیو کې د افغانستان په استازیتوب له دغه ولایت څخه ګډون کړی و.
