د افغانستان ۲۰ کلنې فوټبال ملي لوبډلې د ګافا سيالیو په لومړنۍ لوبه کې ترکمنستان ته ماتې ورکړه
د افغانستان د شل کلنو فوټبال ملي لوبډلې د مرکزي اسیا " ګافا" جام سیالیو په لومړنۍ لوبه کې ترکمنستان ته د ۲/۱ ګولونو په توپیر ماتې ورکړه.
په دې سیالي کې، چې د تاجکستان په پلازمېنه دوشنبه کې ترسره شوه، افغانستان د دویم پړاو په لومړيو کې له سیالې لوبډلې د یو ګول په کولو سره مخکې و؛ خو ډېر ژر ترکمنستان هم وتوانېد چې ګول ترسره کړي.
د لوبې په جریان کې ترکمنستان ته د پینالټي چانس په لاس ورغی، د افغان لوبډلې ګول ساتونکي وکولی شول، چې په پینالټي کې د ګول مخه ونیسي.
د لوبې په دوام د ترکمنستان لوبډلې دوه درې نورې خطرناکې حملې هم د افغانستان د ګول ساتونکي په طرف وکړې؛ خو افغان شل کلنې فوټبال ملي لوبډلې وکولی شول، چې په وروستیو لسو دقیقو کې دویم ګول هم ترسره کړي او د یادې سیالي بریا خپله کړي.
د ګافا شل کلنو فوټبال لوبډلو سیالۍ په تاجکستان کې ترسره کیږي، چې افغانستان، ایران، تاجکستان، ، ترکمنستان، ازبکستان لوبډلې پکې ګډون لري.
سبا به د افغانستان په وخت ۴:۳۰ بجې مازیګر مال د افغان شل کلنو فوټبال ملي لوبډله له تاجکستان سره خپله دویمه سیالي ترسره کړي.
