له اسیایي سیالیو څخه د افغانستان د لومړني مډال ګټلو په ویاړ د تکواندو اړوند پومسې سیالۍ ترسره شوې
د بدني روزنې او ورزش ریاست اړوند د تکواندو ملي فدراسیون له لوري له اسیایي سیالیو څخه د افغانستان د لومړني مډال ګټلو په ویاړ د تکواندو اړوند پومسې سیالۍ ترسره شوې
دغه سیالۍ تېره ورځ د تکواندو ملي فدراسیون په مرکزي جمنازیوم کې د نوموړي فدراسیون له لوري ترسره شوې، چې پکې د پاکستان د مهاجرو ورزشکارنو ترڅنګ له کابل، ننګرهار، هلمند ولایتونو څخه ۱۰۸ ورزشکارنو ګډون کړی و.
دغه سیالۍ د عمر په شپږو ګټګوریو کې د یوې ورځې لپاره ترسره شوې، چې په پایله کې د کابل تکواندو کارانو لوبډلې د ۲۹ نومرو په ترلاسه کولو لومړی، منیر احمد لوبډلې د ۲۵ نومرو په ترلاسه کولو سره دویم، حیدري لوبډلې د ۲۱ نومرو په ترلاسه کولو سره درېیم، بیات لوبډلې د ۱۵ نومرو په ترلاسه کولو سره څلورم او میوند لوبډلې د ۱۱ نومرو په ترلاسه کولو سره پنځم مقام خپل کړ.
هېره دې نه وي چې دغه سیالۍ له اسیایي سیالیو څخه د سید رستم اکبري د لومړي مډال ترلاسه کولو په ویاړ ترسره شوې او موخه یې د تکواندو کارانو د ظرفیت لوړونه وه.
