د المپیک ملي کمېټې او سپورټ عمومې ریاست رئیس انجنیر نظر محمد مطمئن د بېلا بېلو ولایتونو د وزلوبې فدراسیونونو له مشرانو سره ولیدل
د المپیک ملي کمېټې او سپورټ عمومې ریاست رئیس انجنیر نظر محمد مطمئن په پلازمېنې کابل کې د المپیک په ملې کمېټې کې د بېلا بېلو ولایتونو د وزلوبې فدراسیونونو له مشرانو سره لیده کاته وکړل.
د المپیک ملي کمېټې او سپورټ عمومې ریاست رئیس په دې لیدنه کې، چې د یاد ریاست فني او مسلکي معاون حافظ احمد جان، د وزلوبې فدراسیون رئیس سرور جلال هم ورسره وو، د کندهار د ټیم مالک، د بدخشان ،سرپل ، پنجشېر د فدراسیونونو نويو رئیسانو، د فاریاب د فدراسیون معاون او ورسره قومي راغليو مشرانو سره ولیدل، ستونزې او غوښتنې واوریدې او له یو بل سره یې د اړونده موضوعاتو په تړاو نظرونه تبادله کړل.
په دې لیدنه کې د بدخشان، فاریاب او سرپل ولایتونو نویو رئیسانو له ښاغلي نظر محمد مطمئن څخه غوښتنه او هیله څرګنده کړه چې د وزلوبې په راتلونکي ټورنمنټ کې چې په بلخ ولایت کې ترسره کیږي، دوی ته د ګډون چانس ورکړي.
خو د المپیک ملي کمېټې او سپورټ عمومي ریاست مشترابه د یادو مسولینو د غوښتنې په ځواب کې وویل، چې د وزلوبې په راتلونکي تورنمنټ کې، چې د هیواد په شمال کې به جوړ شي، د دوی د ګډون پر اړه به مشورتي بورډ او کمسیون پریکړه کوي، چې د ګډون جوګه ګڼل کیږي او کنه.
یادو چارواکو په ټینګار سره وویل، چې د وزلوبې په تېر ليګ کې د نه ګډون مسئله تېرو مسوولینو ته ورګرځي او دوی ته باید د مزارشریف په کوربتوب د وزلوبې په راتلونکي ټورنمنټ کې د ګډون چانس ورکړي.
