خوست کې د والیبال لوبو پرانېسته وشوه
خوست ولایت ته د المپیک ملي کمېټې او ورزش ریاست د پلاوي د سفر په اوږدو کې نن تر غرمې وروسته په یاد ولایت کې د سویل زون د والیبال اتلولۍ لوبو پرانېسته وکړه.
په دغو لوبو کې شپږ لوبډلې ګډون لري، چې په دوه ګروپونو کې به د کب میاشتې تر اتلسمې نېټې یادې لوبې روانې وي.
په دغو لوبډلو کې پکتیا، لوګر، غزني، پکتیکا او دوه د خوست لوبډلې شاملې دي او د یادو لوبو موخه د والیبال ملي لوبډلې لپاره د غوره لوبغاړو ټاکل دي.
د والیبال پرانېست غونډه کې د تللي پلاوي تر څنګ د خوست والي محمد نبي عمري، د خوست د ورزش مسوولینو، ورزشکارانو او د ورزش ګڼو مینهوالو برخه اخیستې وه.
د غونډې په پیل کې د خوست والي ښاغلي عمري وویل؛ اوس ټولو تر روښانه شوه چې اسلامي امارت د ورزش او تعلیم مخالف نه، بلکې تر هر چا کلک ملاتړی دی.
نوموړي همدارنګه ورزش د هر مسلمان لپاره اړین او ګټور یاد کړ او په دغه ولایت کې یې د ورزش او ورزشکارانو د هر ډول ملاتړ ډاډ ورکړ.
ښاغلي عمري خوستۍ لوبډلې سره ژمنه وکړه، چې د اتلولي په ګټلو سره ځانګړې ډالۍ ورکوي.
د المپیک ملي کمېټې او ورزش رییس انجینر نظرمحمد مطمئن خوښي وښوده، چې پخوا خوست یو ناامنه ولایت و، خو اوس پکې د امن بستر خور دی او ورزشکاران په ډاډه زړه او ارامه فضا کې ورزش کوي.
ښاغلي مطمئن د ورزشکارانو او ورزشي مسوولینو ته ډاډ ورکړ، چې ستونزې به یې حلېږي. نوموړي همدارنګه ژمنه وکړه، چې راتلونکي کې به داسې لا ډېرو لوبو کېدو ته زمینه برابره کړي.
د خوست ورزشي مسوولینو له مرکز څخه ورغلي پلاوي ته د خپلو کارونو راپور وړاندې کړ او پلاوي سره یې خپلې ستونزې شریکې کړې. همدارنګه پخپلو خبرو کې د یو جمنازیوم د جوړېدو غوښتونکي شول.
د والیبال فدراسیون رییس یاده کړه، چې دا لومړی ځل د سویل زون والیبال لوبې په خوست کې کېږي او دا د ورزش ادارې د ملاتړ ښکارندویي کوي. نوموړی د ورزش ادارې د مشرتابه له ملاتړه خوښي وښوده.
یاده دې وي، چې خوست ولایت کې د والیبال پیلېدونکې لوبې د سویل زون د اتلولۍ سیالۍ دي، چې سږکال په خوست ولایت کې کېږي او پینځه ورځې به دوام وکړي.
