ميدان وردگ کې د پنځو ولايتونو ترمنځ د پهلوانۍ سيالۍ پای ته ورسېدې
د ميدان وردگ ولايت د بدني روزنې او ورزش آمريت په همغږۍ، د پهلوانۍ ملي فدراسيون له لوري د ياد ولايت په مرکزي جمنازيوم کې له پنځو ولايتونو ۵۰۰ پهلوانانو ترمنځ د "مڼې گل" په نوم د پهلوانۍ لومړی پړاو سيالۍ پای ته ورسېدې.
په يادو سياليو کې له کابل، غزني، لوگر، باميان او کوربه ميدان وردگ ولایت څخه پهلوانانو په بېلابېلو وزني او عمري کټگوریو کې گډون کړی وو، چې په پايله کې ميدان وردگ لومړی، غزني دويم او لوگر بيا درېيم مقام خپل کړ.
د ويلو وړ ده، چې د دغو سياليو د پای په مراسمو کې د هېواد ورزش ادارې مشاور او د پهلوانۍ ملي فدراسيون رئيس قاري حيات الله رحماني، د ياد ولايت د ورزش آمر ذبيح الله وهاج، د بېلابېلو فدراسيونونو استازو او گڼ شمېر مينوالو گډون کړی وو.
