کندز؛ کلباد ولسوالۍ کې د نهو لوبډلو ترمنځ د واليبال سيالۍ پای ته ورسېدې
د کندز ولايت د بدني روزنې او ورزش ریاست په همکارۍ، د واليبال فدراسيون د استازولۍ له لوري د ياد ولايت په کلباد ولسوالۍ کې د نهو لوبډلو ترمنځ د واليبال سيالۍ د بشارت لوبډلې په اتلولۍ پای ته ورسېدې.
د يادو سياليو پايلوبه کې بشارت لوبډلې خپلې سيالې الچينو لوبډلې ته د ۱۷ پر ۱۰ امتيازونو په توپير ماتې ورکړه او اتلولي يې وگټله.
دا سيالۍ ورزش ته د ځوانانو هڅولو او د يادې ولسوالۍ وگړو لپاره د سالمې تفريح برابرولو په موخه وشوې، چې يوه ورځ يې دوام وکړ.
