غزني کې د جاغوري معارف جام د فوټسال او والیبال سیالۍ پای ته ورسېدې
د غزني ولایت د بدني روزنې او ورزش امریت اړوند د جاغوري ولسوالۍ ورزشي مدیریت له لوري او د بنیاد رحیمیان په مالي ملاتړ په یادې ولسوالۍ کې د جاغوري معارف جام د فوټسال ۲۱ لوبډلو او والیبال ۲۵ لوبډلو ترمنځ د فوټسال او والیبال سیالۍ د سلطاني الف لېسې فوټسال لوبډلې او د پسرانه بابه لېسې والیبال لوبډلې په اتلولۍ پای ته ورسېدې.
د دغو سیالیو په پایلوبه کې سلطاني الف لېسې لوبډلې خپلې سیالې شهدا حیدر فوټسال لوبډلې ته د ۴/۱ ګولونو په توپير ماتې ورکړه او اتلولي یې خپله کړه.
د والیبال لوبې په پایلوبه کې پسرانه بابه لېسې لوبډلې خپلې سیالې شهداء غوغه لوبډلې ته د ۳/۱ میدانونو په توپير ماتې ورکړه او اتلولي یې خپله کړه
د یادو سیالیو موخه د فوټسال او والیبال لوبو ته وده ورکول او د ځوانانو هڅول و، چې درې اوونۍ یې دوام وکړ.
د سیالیو په پای کې غوره لوبډلو ته د اتلولۍ جامونه او غوره لوبغاړو ته ورزشي ډالۍ ورکړل شوې.
