خوست؛ موسی خېلو ولسوالۍ کې د ۱۸ لوبډلو ترمنځ د ټېپ بال کرېکټ سيالۍ پای ته ورسېدې
د خوست ولايت د بدني روزنې او ورزش آمريت اړوند د ټېپ بال کرېکټ فدراسيون د استازولۍ له لوري د موسی خېلو ولسوالۍ په مرغې جواس سيمه کې د ۱۸ لوبډلو ترمنځ د ټېپ بال کرېکټ سيالۍ، چې دوې مياشتې مخکې پيل شوې وې د پيرانو زلميو لوبډلې په اتلولۍ پای ته ورسېدې.
د يادو سياليو پايلوبه د پيرانو زلميو او مهرال لوبډلو ترمنځ ترسره شوه. د لوبې پچه پيرانو زلميو لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې سيالې لوبډلې ته د ۱۷۶ منډو هدف وټاکه، په مقابل کې مهرال لوبډلې د ټولو اورونو په لوبولو سره ۱۵۸ منډې وکړې او لوبه يې د ۱۷ منډو په توپير وبايلله.
ياده دې وي، چې د دغو سياليو په پای کې اتلې لوبډلې ته ۱۰٫۰۰۰ زره افغانۍ او دويم مقام گټونکې لوبډلې ته ۴٫۰۰۰ زره افغانۍ ورکړل شوې.
