ارزګان؛ مرکز ترينکوټ ښار کې د ٣٠ لوبډلو ترمنځ د ټېپ بال کرېکټ سیالۍ پای ته ورسېدې
د ارزګان ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت مرکز ترينکوټ ښار کې د ٣٠ لوبډلو ترمنځ د ټېپ بال کرېکټ سیالۍ د ګولډن سټار لوبډلې په اتلولي پای ته ورسېدې.
د یادو سیالیو پایلوبه د وصال او ګولډن سټار لوبډلو ترمنځ ترسره شوه. د لوبې پچه وصال لوبډلې وګټله او لومړی یې توپ وهنه وکړه، چې په ټاکلو لسو اورونو کې یې د شپږو ویکټو په زیان خپلې سیالې لوبډلې ته د ٧٧ منډو هدف وټاکه. ګولډن سټار لوبډلې ټاکلی هدف د یوې ویکټې په زیان د لوبې په شپږم اور کې ترلاسه کړ او د نهو ویکټو په توپیر یې د دغو سیالیو اتلولي وګټله.
دا سیالۍ د ځوانانو ترمنځ د یووالي په موخه ترسره شوې، چې ٢٠ ورځې یې دوام وکړ.
