پکتیکا؛ مرکز ښرنه کې د فوټبال ورزشي سټډیوم بیا رغول بشپړ او پرانیسته یې ترسره شوه
د المپیک، بدني روزنې او ورزش عمومي ریاست له لوري د پکتیکا ولایت مرکز ښرنه کې د فوټبال مرکزي لوبغالی بیا ورغول شو او پرانیسته یې ترسره شوه.
د دغه لوبغالي د بیا رغونې چارې د ۵۵۰،۰۰۰ افغانیو په لګښت د اتو میاشتو په موده کې بشپړې شوې او
په رسمي ډول یې پرانیسته ترسره شوه.
د دغه لوبغالي د پرانیستې په مراسمو کې د المپیک، بدني روزنې او ورزش عمومي رئیس مولوي احمدالله وثیق او ورسره مل پلاوي، د پکتیکا ولایت د ورزشي آمریت مسؤولانو، د بېلابېلو ورزشي فدراسیونو استازو، ورزشکارانو او د ورزش ګڼو مینوالو ګډون کړی و.
د یادونې وړ ده، چې د د غه لوبغالي د پرانیستې په موخه د ارګون ۱۹ کلنې او مرکزي ۱۹ کلنې لوبډلو ترمنځ د فوټبال دوستانه سیالۍ هم ترسره شوه، چې په پایله کې یې ارګون ۱۹ کلنې لوبډلې د ۳/۰ ګولونو په توپیر خپلې سیالې مرکزي ۱۹ کلنې لوبډلې ته ماتې ورکړه.
د لوبې په پای کې یو شمېر ورزشي لوبډلو ته نغدي ډالۍ هم ورکړل شوې.
