ننګرهار په شينوارو ولسوالۍ کې د ۳۲ لوبډلو ترمنځ د ټېپ بال کرکټ سیالۍ پای ته ورسیدې
د ننګرهار ولایت د بدني روزنې او ورزش رياست اړوند د ټېپ بال کرکټ فدراسيون د استازولۍ له لوري د ياد ولايت په شينوارو ولسوالۍ کې د ۳۲ لوبډلو ترمنځ د ټېپ بال کرکټ سیالۍ د کوټ جبار لوبډلې په اتلولۍ پای ته ورسیدې.
د دغو سياليو پايلوبه د طورخم سوپر سټار او کوټ جبار لوبډلو ترمنځ ترسره شوه، طورخم سوپر سټار لوبډلې د پچې په ګټلو سره د توپ وهنې پرېکړه وکړه، چې په ټاکلو نهو اورونو کې یې د نهو لوبغاړو په سوځېدو سره مقابلې لوبډلې ته د ۱۷۰ منډو هدف وټاکه. په ځواب کې د کوټ جبار لوبډلې ټاکل شوی هدف د لوبې په وروستي اور کې د شپږو لوبغاړو په سوځېدو سره پوره کړ او د څلورو ويکټو په توپير يې اتلولي وګټله.
د يادو سياليو موخه يووالی او له نظام څخه ملاټر و، چې يوه مياشت يې دوام وکړ.
