ننګرهار؛ په مرکز جلال اباد کې د ۴۰ ورزشکارانو ترمنځ د سوک وهنې سيالۍ وشوې
د ننګرهار ولايت د بدني روزنې او ورزش ریاست په لارښوونو د سوک وهنې فدراسیون د استازولۍ له لوري د جلال اباد ښار په دویمه ناحیه کې د ۴۰ ورزشکارانو ترمنځ د سوک وهنې سیالۍ وشوې.
يادې سيالۍ د نيازي او چپرهار کلبونو د ۴۰ ورزشکارانو ترمنځ وشوې، چې په پايله کې شلو ورزشکارانو برياوې او لومړي مقامونه خپل کړل.
هېره دې نه وي، چې يادو سياليو يوه ورځ دوام وکړ او په پای کې غوره ورزشکارانو ته مډالونه او ستاينليکونه ورکړل شول.
