پکتیکا؛ مرکز ښرنه کې د ٢٠ لوبډلو ترمنځ د ټېپ بال کرېکټ سیالۍ پیل شوې
د پکتیکا ولایت د بدني روزنې او ورزش امریت اړوند د ټېپ بال کرېکټ فدراسیون د استازولۍ له لوري د ياد ولایت مرکز ښرنه کې د ٢٠ لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د چهاردرې او ارګون لوبډلو ترمنځ ترسره شوه. د لوبې پچه ارګون لوبډلې وګټله او لومړی یې توپوهنه وکړه، چې په ټاکلو اوو اورونو کې یې د شپږو ویکټو په زیان خپلې سیالې لوبډلې ته د سل منډو هدف وټاکه. چهاردرې لوبډلې هم په ټاکلو اورونو کې لوبه مساوي کړه خو په سوپر اور کې یې خپلې سیالې ارګون لوبډلې ته د دوو منډو په توپیر ماتې ورکړه او د سیالیو لومړۍ لوبه یې وګټله.
دا سیالۍ د ځوانانو لپاره د سالمې تفرېح برابرولو په موخه پیل شوي دي، چې لس ورځې به دوام وکړي.
