غور؛ د فيروزکوه ښار فوټسال الف ليگ سيالۍ د شيران مندوزي لوبډلې په اتلولۍ پای ته ورسېدې
د غور ولايت ولايت د بدني روزنې او ورزش امريت اړوند د فوټبال فدراسيون د استازولۍ له لوري د ياد ولايت په مرکز فيروزکوه ښار مرکزي جمنازيوم کې د ۱۴ لوبډلو ترمنځ د فوټسال الف ليگ سيالۍ، چې دوې اوونۍ مخکې پيل شوې وې د شيران مندوزي لوبډلې په اتلولۍ پای ته ورسېدې.
د يادو سياليو په پايلوبه کې شيران مندوزي لوبډلې خپلې سيالې فولاد لوبډلې ته د ۶ پر ۵ گولونو په توپير ماتې ورکړه او اتلولي يې په خپل نوم کړه.
په دغو سياليو کې ناصر د ۲۸ گولونو په وهلو غوره گول وهونکی، امان الله غوره لوبغاړی او حامد بوا غوره گول ساتونکی ونومول شو، چې په پای کې لوبډلو او غوره لوبغاړو ته چمتو شوې ډالۍ ورکړل شوې.
