د هرات مرکز کې د ۱۶۰ ورزشکارانو ترمنځ د رزمي لوبو ټولشموله سیالۍ ترسره شوې
د هرات ولایت د بدني روزنې او ورزش امریت اړوند د رزمي لوبو ملي فدراسیون د استازولۍ له لوري په یاد ولایت کې له ۴۰ کلبونو د ۱۶۰ ورزشکارانو ترمنځ د رزمي لوبو ټولشموله سیالۍ ترسره شوې، چې یوه ورځ یې دوام وکړ.
دغه سیالۍ، چې د تنکیو ځوانانو، نویو ځوانانو، ځوانانو او د لویانو ورزشکارانو په عمري کټګوریو کې ترسره شوې، په پایله کې ۸۰ ورزشکارانو خپلو سیالانو ته په ماتې ورکولو سره لومړي او د اتلولۍ مقامونه یې ترلاسه کړل.
د سیالیو په پای کې د ورزش مسوولینو له لوري غوره ورزشکارانو ته د اتلولۍ حکمونه، مډالونه او چمتو شوې ډالۍ ورکړل شوې.
