بغلان کې د ۶۰ ورزشکارانو ترمنځ د رزمي لوبو په سلف دیفنس سبک کې سیالۍ ترسره شوې
د بغلان ولایت د بدني روزنې او ورزش امریت اړوند د رزمي لوبو ملي فدراسیون د استازولۍ له لوري د یاد ولایت په پلخمري ښار کې له کندز، تخار، سمنګان، بلخ او بغلان ولایتونو د ۶۰ ورزشکارانو ترمنځ د رزمي لوبو په سلف دیفنس سبک کې سیالۍ ترسره شوې.
دغو سیالیو، چې یوه ورځ یې دوام وکړ، په پایله کې د بغلان ولایت ورزشکارانو د زیاتو امتیازونو په ترلاسه کولو سره لومړی، د تخار ولایت ورزشکارانو دویم او د کندز ولایت ورزشکارانو بیا درېیم مقام ترلاسه کړ.
د یادو سیالیو موخه رزمي لوبو ته وده ورکول او ورزش ته د ځوانانو هڅول و.
د سیالیو په پای کې غوره ورزشکارانو ته چمتو شوې ډالۍ ورکړل شوې.
