د هېواد د ورزش ادارې رهبري د سرپل له والي سره ولیدل
د المپیک، بدني روزنې او ورزش ریاست عمومي ريیس مولوي احمدالله وثیق او ورسره مله پلاوي سرپل ولایت ته د سفر په ترڅ کې د یاد ولایت له والي مولوي محمد ظریف مظفر سره ولیدل.
په دغه لیدنه کې د بدني روزنې او ورزش عمومي ريیس مولوي احمدالله وثیق، د ياد رياست فني او مسلکي مرستیال حافظ احمد جان ځدراڼ، ورزشي ستر سلاکار قاري حیات الله رحماني او ورسره مل پلاوي، د سرپل والي مولوي محمد ظریف مظفر، د ياد ولايت د است.خباراتو ريیس ملا بحرالدین سیف الله او د ياد ولايت نورو دولتي کارکوونکو او قومي مشرانو ګډون کړی و.
مولوي احمدالله وثیق په دغه لیدنه کې د هېواد د ورزش د وروستیو لاسته راوړنو په اړه خبرې وکړې او زیاته یې کړه، چې هڅه کوي د افغانستان ټولو لرې پرتو سیمو ته ورزش ورسوي.
په ورته وخت کې د سرپل والي ښاغلي مولوي محمد ظریف مظفر د هېواد وروستۍ ورزشي لاسته راوړنې وستایلې او همداراز په یاد ولایت کې یې ورزش ته د ودې ورکولو په برخه کې د هر ډول ممکنه مرستو ژمنه وکړه.
