هلمند؛ ګرمسېر ولسوالۍ کې د ۲۴ لوبډلو ترمنځ د فوتسال سیالۍ پای ته ورسېدې
د هلمند ولایت د بدني روزنې او ورزش امریت اړوند د فوټبال فدراسیون د استازولۍ له لوري د یاد ولایت په ګرمسېر ولسوالۍ کې د ۲۴ لوبډلو ترمنځ د فوټسال سیالۍ د اقبال لوبډلې په اتلولي پای ته ورسېدې.
د یادو سیالیو پایلوبه د اقبال او درویشیان لېسې لوبډلو ترمنځ ترسره شوه، چې په پایله کې یې اقبال لوبډلې د ۸/۱۲ ګولونو په توپیر خپلې سیالې لوبډلې ته ماتې ورکړه او اتلولي یې وګټله.
د سیالیو په پای کې میراغا د سیالیو غوره لوبغاړی، جاويد فیصل غوره ګول وهونکی او نقیب الله غوره ګول ساتونکی ونومول شو.
دا سیالۍ د ګرمسېر ولسوالۍ ټاکنیزې لوبډلې ته د غوره لوبغاړو د ټاکلو په موخه ترسره شوې، چې یوه نیمه میاشت یې دوام وکړ.
