لغمان کې د څلورو ولایتونو ترمنځ د والیال غوره لیګ سیالۍ پای ته ورسېدې
د بدني روزنې او ورزش ریاست اړوند د والیبال ملي فدراسیون له لوري په لغمان کې له څلورو ولایتونو د پنځو لوبډلو ترمنځ د والیبال غوره لیګ سیالۍ د کونړ منتخبې لوبډلې په اتلولي پای ته ورسېدې.
په دغو سیالیو کې د لغمان منتخبې، لغمان ب، ننګرهار، کونړ او نورستان منتخبو لوبډلو ګډون کړی و، چې پایلوبه یې د لغمان ب او کونړ منتخبې لوبډلې ترمنځ ترسره شوه او په پایله کې یې کونړ منتخبې لوبډلې د ۲/۳ میدانونو په توپیر خپلې سیالې لوبډلې ته ماتې ورکړه او اتلولي یې وګټله.
دا سیالۍ د ختیځ زون په کچه د افغانستان والیبال غوره لیګ سیالیو ته د غوره لوبغاړو د ټاکلو په موخه ترسره شوې، چې درې ورځې یې دوام وکړ.
