کندهار کې د فوټبال اتلانو لیګ پیل شو

تېره ورځ چهار شنبه په کندهار احمدشاهي لوبغالي کې د افغانستان اتلانو د فوټبال لیګ څلورم او وروستۍ پړاو په رسمي توګه د خاصو مراسیمو په ترڅ کي پيل شو.

د اتلانو د لیګ په مراسمو کې د افغانستان د فوټبال فدارسیون رییس محمدیوسف کارګر، عبدالرؤف کندهاري، حاجي نصیر رحماني، د کندهار د سپورټ او بدني روزني رییس محمدابرار لبیب، د کندهار فوټبال فدراسیون رییس حاجي حبیب جان، د هرات فوټبال فدراسیون رییس شاه رسول احراري او نورو ولایتونو څخه د فدارسیونونو رییسانو او مېلمنو ګډون کړی و.

د افغانستان اتلانو د لیګ د څلورم پړاو په لومړۍ لوبه کې د کندهار عينومېني لوبډلي 5-1 جوانان لغمان لوبډلې ته ماته ورکړه.

د کندهار عینومېني لوبډلې له پاره احمدنبي 2+، عبدالنافع2+ او سیداحمد ګولونه ولګول او د جوانان لغمان له پاره بیا مهدي ګول وواهه.

د افغانستان اتلانو د لیګ په دوهمه لوبه کې د هرات سرخ پوشان لوبډلې 3-1 د سرپل خديم اف سي لوبډلې ته ماته ورکړه.

د هرات سرخ پوشان لوبډلي له پاره معین کمالي، صبور رحیمي او خلیل احمدي ګولونه ولګول او د سرپل خدیم اف سي لوبډلي له پاره بیا حیات الله سلیمي پینالټي ګول کړ.

د یادوني وړ ده، چې د مراسمو په پای کې د افغانستان د فوټبال فدراسیون رییس محمد یوسف کارګر د کندهار د سپورټ او بدني روزنې د رییس محمدابرار لبیب او کندهار فوټبال فدراسیون کارونه د ستاینې وړ وبلل او د سپورټ او بدني روزنې رییس محمدابرار لبیب ته یې ایوارډ هم ورکړ.