کندز کې د والیبال سیالۍ پای ته ورسېدې
د کندز ولایت د خاناباد او اختاش ولسوالیو له بېلابېلو سیمو څخه د ۱۲ لوبډلو پیل شوی ټورنمنټ پای ته ورسېد.
یاد ټورنمنټ په څو ګروپونو کې د اختاش ولسوالۍ په کدوګان سیمه کې وشو.
د یاد ټورنمنټ پایلوبه تېره ورځ وشوه، چې د کدوګان او اختاش لوبډلو تر منځ وشوه.
پایلوبه درې د دوه پر وړاندې د کدوګان لوبډلې په ګټه پای ته ورسېده او د ټورنمنټ اتلولي یې پخپل نوم کړه.
د دغو لوبو موخه د ځوانانو تر منځ د سالم رقابت وده او د ولسوالیو لوبډلو لپاره د غوره لوبغاړو ټاکنه یاده شوې ده.
هېره دې نه وي چې د یادو سیالیو پایلوبې ته د کندز د ورزش امر عبدالمجید بکتاش او د والیبال فدراسیون استازي ګډون کړی و، چې ګټونکې لوبډله یې په ډالیو ونازوله.
