کندز ؛ قلعه ذال ولسوالۍ کې د اتو لوبډلو ترمنځ د شل کلنو کم عمره د فوټبال سیالۍ پای ته ورسېدې
د کندز ولایت د بدني روزنې او ورزش ریاست اړوند د فوټبال ملي فدراسیون د استازولۍ له لوري د یاد ولایت په قلعه ذال ولسوالۍ کې د اتو لوبډلو ترمنځ د شل کلنو کم عمره د فوټبال سیالۍ د اتحاد ینګي ارق لوبډلې په اتلولۍ پای ته ورسېدې.
د دغو سیالیو په پایلوبه کې د اتحاد ینګي ارق لوبډلې خپلې سیالې اقتیپه لوبډلې ته د ۲/۰ ګولونو په توپير ماتې ورکړه او اتلولي یې خپله کړه.
د یادو سیالیو موخه د فوټبال ورزش ته وده ورکول او ورزش ته د ځوانانو هڅوول و، چې یوه میاشت یې دوام وکړ.
د سیالیو په پای کې د کندز ورزشي ریاست له لوري غوره لوبډلې ته د اتلولۍ جام او غوره لوبغاړو ته مډالونه ورکړل شول.
