کفایت لوبډلې په بلخ کې د لسو لوبډلو ترمنځ د والیبال سیالیو اتلولي وګټله
د بلخ ولایت د والیبال فدراسیون استازولۍ له لوري د یاد ولایت بدني روزنې او سپورت ریاست په همغږۍ د لسو لوبډلو ترمنځ د والیبال سیالۍ، چې دوې اوونۍ وړاندې پیل شوې وې، د کفایت لوبډلې په اتلولۍ پای ته ورسیدې.
د دې ټورنمنټ پای لوبه د کفایت او عامې روغتیا لوبډلو ترمنځ ترسره شوه، چې په پایله کې کفایت لوبډلې د ۳-۱ میدانونو په توپیر خپلې سیالې لوبډلې ته ماتې ورکړه.
د پایلوبې په مراسمو کې د ورزش مسؤولینو تر څنګ د والیبال فدراسیون استازو، د دولتي ادارو استازو، ځوانانو او ګڼ شمېر مینه والو برخه اخیستې وه.
په پای کې په ګټونکو لوبډلو او غوره لوبغاړو کپونه، ستاینلیکونه او سپورتي جامې ووېشل شوې.
