کابل کې د تکواندو ۵۰ استاذانو ته په تکواندو برخه کې لومړی پړاو معياري ښوونيز سيمينار پيل شو
د المپيک، بدني روزنې او ورزش عمومي رياست اړوند د تکواندو فدراسيون له لوري د ياد فدراسيون په مرکزي جمنازيوم کې د کابل ولايت د تکواندو ۵۰ استاذانو ته د تکواندو په بېلابېلو برخو کې د تکواندو لومړی پړاو معياري ښوونيز سيمينار پيل شو.
په دغه سيمينار کې د تکواندو ملي فدراسيون ريئس ډاکتر نجیب الله سکندر، د يادې برخې ورزشي مسوولينو، د تکواندو برخې روزونکو او د تکواندو استاذانو ګډون کړی وو.
د دغه سيمينار په پرانيستغونډه کې د تکواندو فدراسيون ريئس ډاکتر نجیب الله سکندر روزونکو او استاذانو ته د ښه راغلاست تر څنګ وويل: « د خوښۍ ځای دی، چې د تکواندو په برخه کې دغه ډول برنامو کې ګډون کوم، دغه سيمينار د استاذانو لپاره ډېر مهم دی، تر څو ورزش مو معياري او ورزشکاران مو لا ښه روزنه ترلاسه کړي او په نړيوالو سياليو کې ښې لاسته راوړنې ولري» په پای کې له روزونکو څخه مننه وکړه، چې د استاذانو لپاره درسي مواد چمتو کوي او تدريسوي.
دغه سيمينار د مختلفو استاذانو له لوري تدريسيږي، چې پکې به د تمرين په اصولو، تخنيکي، تکنيکي د لاس او پښو په اساسي حرکتونه، د پومسه سبک په معياري قوانينو، د پومسه سبک شخصي دفاع او د ګيروګي سياليو په قوانينو خبرې وشي.
د ياد سيمينار موخه استاذانو ته په معياري ډول د تکواندو په اصولو پوهه ترلاسه کول دي، چې اته اوونۍ به دوام وکړي.
