کابل کې د تکواندو ملي لوبډلې ټاکنيزې سيالۍ پيل شوې
د المپيک، بدنې روزنې او ورزش عمومي رياست اړوند د تکواندو ملي فدراسيون له لوري د ملي لوبډلې د نويو ځوانانو دولسم پړاو او د لويانو لومړی پړاو ټاکنيزې سيالۍ د ۳۰۰ ورزشکارانو په ګډون د دې رياست په ۵۰۰ کسيز جمنازيوم کې پيل شوې.
د دې سياليو د پيل په مراسمو کې د المپيک، بدني روزنې او ورزش عمومي رياست عمومي رئيس، مولوي احمدالله وثيق، د المپيکي چارو رئیس داد محمد پاينده اختري، د کورنیوچارو وزارت وياند، مفتي عبدالمتين قانع، د المپيک کمېټې مرستيال، باور هوتک، د دې رياست مالي او اداري رئيس، مولوي عبدالناصر هاشمي، د عوت او ارشاد رئيس، مولوي داد محمد بريال عطايي، د نشراتو رئيس اتل مشواڼي، د دفتر رئيس فضل الرحمن بري، د ننګرهار د ورزش ادارې رئیس عبدالسلام وزیروال، د تکواندو ملي فدراسيون رئيس دوکتور نجيب الله سکندر، ورزشي مسوولينو او د ورزش مينه والو ګډون کړی و.
د دې سياليو د پرانيستې په موخه جوړو شويو مراسمو کې د هېواد د ورزش ادارې عمومي رئيس ښاغلي مولوي احمدالله وثيق وويل، خوښ يم، چې د تکواندو ملي لوبډلي ټاکنيزو سياليو کې ګډون کوم. دغه راز نوموړي زياته کړه، چې د تکواندو ملي لوبډلې لوبغاړو هېواد ته ډېر وياړونه راوړي دي او له ياد فدراسيون يې وغوښتل، چې لانور استعدادونه وروزي، ترڅو له نړيوالو سياليو وياړونه راوړي او د هېواد نوم لاوځلوي.
د ويلو وړ ده، چې دغه سیالۍ په ايران کې د ميشت افغان کډوالو ورزشکارانو په ګډون د هېواد د ۲۰ ولايتونو د لوبډلو ترمنځ په دوو سبکونو مبارزې او پومسه کې ترسره کېږي، چې د مبارزي برخه کې به يې تنکي ځوانان او د پومسې په برخه کې به يې لويان د يو بل پر وړاندې د سيالۍ ډګر ته ښکته شي، چې په پايله کې به يې ۴۰ تنه د تنکيو ځوانانو ملي لوبډلې ته او ۲۰ تنه د لويانو ملي لوبډلې ته وټاکل شي.
