کابل کې د تکواندو ملي لوبډلې ټاکنيزې سيالۍ د ۶۰ غوره لوبغاړو په ټاکلو سره پای ته ورسېدې
د المپيک، بدنې روزنې او ورزش عمومي رياست اړوند د تکواندو ملي فدراسيون له لوري د ملي لوبډلې د تنکیو ځوانانو دولسم پړاو او د لويانو لومړی پړاو ټاکنيزې سيالۍ، چې د ۳۰۰ ورزشکارانو په ګډون، درې ورځې وړاندې د دې رياست په ۵۰۰ کسيز جمنازيوم کې پيل شوې وې، پای ته ورسېدې.
د دې سياليو د پای په مراسمو کې د هېواد د ورزش ادارې فني او مسلکي مرستيال حافظ احمد جان ځدراڼ، د تکواندو ملي فدراسيون رئيس ډاکټر نجيب الله سکندر، ورزشي مسوولينو او ورزشکارانو ګډون کړی و.
دغه سیالۍ،چې په ايران کې د ميشت افغان ورزشکارانو په ګډون د هېواد د ۲۰ ولايتونو د لوبډلو ترمنځ په دوو سبکونو مبارزې او پومسه کې ترسره شوې، په پای کې يې د تنکيو ځوانانو ملي لوبډلې ته ۴۰ تنه او د لويانو ملي لوبډلې ته ۲۰ تنه غوره لوبغاړي وټاکل شول.
د يادو سياليو د تنکيو ځوانانو په برخه کې کابل د ۴۳ نمرو په ترلاسه کولو سره لومړی مقام، هرات د ۱۵ نمرو سره دويم مقام او ايران کې د افغان کډوالو لوبډلې د ۸ نمرو په ترلاسه کولو سره درېيم مقام، تخار د ۸ نمرو سره څلورم مقام او پروان د ۶ نمرو سره بیا پينځم مقام خپل کړ. دغه راز تميم الرحمن رحمانې د ۱۷۴ نمرو په ترلاسه کولو سره د د دغه سياليو غوره لوبغاړی وټاکل شو.
همدارنګه د لويانو په برخه کې بیا کابل لومړی مقام، هلمند دويم مقام، بغلان درېيم، تخار څلورم او ننګرهار لوبډلې پينځم مقام ترلاسه کړ.
د ويلو وړ ده، چې د سياليو په پای کې د ورزشي مسولينو له لوري، غوره لوبغاړو او لوبډلو ته، کپونه، مډالونه، ستاينليکونه او نغدي جايزې ورکړل شوې.
