کابل کې د باسکټبال لوبڅاري د شپږمې دورې ورکشاپ ګډونوال تشویق او وستایل شول
د باسکټبال د لوبڅاري شپږمې دورې ورکشاپ ګډونوال د دغه ورکشاپ له پای ته رسېدو وروسته وستایل شول او د یاد فدراسیون له لوري هر یوه ته د لوبڅاري تصدیق پاڼه ورکړل شوه.
په دغې تشویقي غونډه کې د بدني روزنې او ورزش لوی ریاست فني او مسلکي مرستیال حافظ احمدجان ځدراڼ، د باسکټبال فدراسیون رهبري هیئت او د دغه ورکشاپ ګډونوالو ګډون کړی و، چې د ورکشاپ ګډونوالو ته تصدیقپاڼې د حافظ احمد جان ځدراڼ او د باسکټبال فدراسیون د رهبري له لوري ورکړل شوې.
د باسکټبال ملي فدراسیون د لوبڅاري شپږمه روزنیزه دوره د بدني روزنې او ورزش لوی ریاست په همغږي د مرکز او ولایتونو ۳۰ تنو لوبڅارانو ته د یاد ریاست په ۵۰۰ کسیز ورزشي جمنازیوم کې د دوه ورځو لپاره ترسره شوه.