پکتیکا؛ جاني خېلو ولسوالۍ کې د ٢٢ لوبډلو ترمنځ د ټېپ بال کرېکټ سیالۍ پیل شوې
د پکتیکا ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت په جاني خېلو ولسوالۍ کې د ٢٢ لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د جلالزو او هستي کلا لوبډلو ترمنځ ترسره شوه. د لوبې پچه جلالزو لوبډلې وګټله او لومړی یې توپ وهنه وکړه، چې په ټاکلو اوو اورونو کې یې د شپږو ویکټو په زیان خپلې سیالې لوبډلې ته د ٩٩ منډو هدف وټاکه. هستي کلا لوبډلې د هدف په تعقیب کې د اتو ویکټو په زیان ٨٤ منډې وکړې او د ١٤ منډو په توپیر یې لوبه وبایلله.
دا سیالۍ لرې پرتو سیمو کې ورزش ته د ودې ورکولو په موخه پیل شوي دي، چې ١٧ ورځې به دوام وکړي.
