پکتیکا؛ برمل ولسوالۍ کې د ٢٤ لوبډلو ترمنځ د ټېپ بال کرېکټ سیالۍ پای ته ورسېدې
د پکتیکا ولایت د بدني روزنې او ورزش آمریت اړوند د ټېپ بال کرېکټ فدراسیون د استازولي له لوري د ياد ولايت په برمل ولسوالۍ کې د ٢٤ لوبډلو ترمنځ د ټېپ بال کرېکټ سیالۍ د احمدزي چلېنجرز لوبډلې په اتلولي پای ته ورسېدې.
د یادو سیالیو پایلوبه د احمدزي چلېنجرز او لاړ کلب لوبډلو ترمنځ ترسره شوه. د لوبې پچه احمدزي چلېنجرز لوبډلې وګټله او لومړی یې د توپ وهنې پرېکړه وکړه، چې په ټاکلو شپږو اورونو کې یې د خپلو څلورو لوبغاړو په له لاسه ورکولو سره سیالې لوبډلې ته د ١٠٦ منډو هدف وټاکه. لاړ کلب لوبډلې د هدف په تعقیب کې د خپلو اتو لوبغاړو په له لاسه ورکولو سره ٦٠ منډې وکړې او لوبه یې د ٤٥ منډو په توپیر وبایلله.
دغه سيالۍ د پکتیکا لیرې پرتو سیمو ته د ورزش د رسولو په موخه ترسره شوې، چې ٢٠ ورځې یې دوام وکړ او په پای کې اتلې لوبډلې او غوره لوبغاړو ته چمتو شوې ډالۍ ورکړل شوې.
