پکتیا؛ د احمد خېلو ولسوالۍ لوبډلې د واليبال غوراوي سياليو اتلولي وګټله
د پکتیا ولایت بدني روزنې او ورزش ریاست په مرسته د واليبال فدراسيون له لوري د دې ولایت د مرکز او ولسواليو د ٢٤ لوبډلو ترمنځ ١٤٠٢ کال واليبال منتخبې لوبډلې د غوراوي سیالۍ د احمد خېلو ولسوالۍ لوبډلې په اتلولۍ سره پاى ته ورسېدې.
دغه سیالۍ, چې په لومړي ځل د پکتيا د ورزش رياست له لوري د ولايتي لوبډلې لپاره د غوره ورزشکارانو د ټاکلو په موخه پیل شوې وې، ١٢ ورځې يې دوام وکړ، چې په پايله کې يې ١٨ تنه غوره ورزشکارانو د پکتيا ولايت د والیبال منتخبې لوبډلې ته وټاکل شول.
د يادو سياليو په پايلوبه کې د احمد خېلو ولسوالۍ لوبډلې د ٣-٢ ميدانونو په توپیر د پټان لوبډلې ته ماتې ورکړه او د دې سياليو اتلولي يې خپله کړه.
په پاى کې هغو ورزشکارانو ، چې منتخبې لوبډلې ته يې لار وموندله د اتلولۍ حکمونه او همداراز د لومړي او دویم مقام ګټونکو لوبډلو ته کپونه او ورزشي لباسونه ورکړ شول.
همداراز څپروال د منتخبي لوبډلې د کوچ او روزونکي په توګه وټاکل شو.
