پکتيکا؛ په مرکز ښرنه کې د ۱۸ لوبډلو ترمنځ د ټېپ بال کرکټ سيالۍ پای ته ورسېدې
د پکتيکا ولايت د بدني روزنې او سپورټ امريت اړوند د ټېپ بال کرکټ فدراسيون د استازولۍ له لوري د ياد ولايت په مرکز ښرنې ښار کې د ۱۸ لوبډلو ترمنځ د لوی اختر په مناسبت د ټېپ بال کرکټ سيالۍ د نوي محمد يارخېلو لوبډلې په اتلولۍ پای ته ورسېدې.
د يادو سياليو پايلوبه د نوي محمد يارخېلو او ښرنې لوبډلو ترمنځ ترسره شوه، ښرنې لوبډلې د لوبې پچې په گټلو سره په ټاکلو لسو اورونو کې سيالې لوبډلې ته د ۱۰۱ منډو هدف کېښود، نوي محمد يارخېلو لوبډلې ياد هدف په وروستي اور کې ترلاسه کړ او د دوو ويکټو په توپير يې بريا خپله کړه.
دغه سیالۍ، چې يوه اوونۍ يې دوام وکړ، په پای کې اتلې لوبډلې ته بېلابېلې چمتو شوې ډالۍ ورکړل شوې.
