په کابل کې د روسيې سفير د هېواد د ورزش ادارې له عمومي رئيس سره وليدل
په کابل کې د روسيې هېواد سفير دميتري ژيرنوف د هېواد د المپيک، بدني روزنې او ورزش عمومي رياست له رئيس مولوي احمدالله وثيق سره د نوموړي په کاري دفتر کې وليدل.
په دغه ليدنه کې ښاغلي مولوي احمدالله وثيق، کابل کې د روسيې سفير او مل پلاوي ته د ښه راغلاست ترڅنګ په افغانستان کې د ورزش ودې او وروستيو لاسته راوړنو پر هکله هر اړخيز معلومات وړاندې کړل او د ورزش په برخه کې يې د دوه اړخيزو همکاريو غوښتنه وکړه.
دغه راز نوموړي زياته کړه، چې افغانستان او روسيه ښې دوستانه اړيکې لري او هيله يې څرګنده کړه، چې د دواړو هېوادنو ترمنځ دغه دوستانه اړيکې لا پراخې شي.
همدارنګه د روسیې سفير ښاغلي دميتري ژیرنوف، دا ډول ليدنې د دوه اړخيزو اړيکو په پراختيا کې اغيزمنې وبللې او زیاته يې کړه، چې موږ يو له بل سره ښې اړیکې لرو او زه به له خپلو چارواکو سره د دوه اړخيزو دوستانه اړيکو د لا پراختیا په هکله خبرې وکړم.
د دې ليدنې په پای کې د روسيې سفير او مل پلاوي، په کابل کې د افغانستان د فوټبال فدراسیون له رزشي ميدانونو او ودانیو هم ليدنه وکړه.
